我地而家通常供嘅係強積金（MPF），而公積金（ORSO）係要你入職果間公司有我地先可以揀。一入職嘅時候，如果間公司有ORSO計劃揀嘅話，老細/HR就會要我地係開工之後嘅三十日内決定參加邊一種計劃（MPF定係ORSO）。其實好多人都唔太了解兩者之間有咩分別。咁筆者希望透過呢篇文章比大家對兩者有更深嘅了解，等讀者們真係遇到要揀嘅時候都知道應該點揀。
公積金（ORSO）
首先講下公積金嘅由來先，係強積金於2000年12月1日實施之前，由僱主自己自願設立嘅職業退休保障計劃。其目的係通過呢份計劃令僱員係退休嘅時候有保障（當然同時亦可透過提供呢份計劃令員工留係身邊。因為以前未有強積金嘅時係，顧員係冇任何退休保障）。
強積金（MPF）
強積金全名係強制性公積金計劃。於1995年7月27日港英政府時期通過《強制性公積金計劃條例》並於2000年12月1日實行嘅退休保障政策。除左少數人士獲豁免之外，18至65歲嘅在職人仕，都必須參加強積金計劃（話明強制性）。一般情況下，僱員要到65歲後或個別原因（可參考六種情況可以提早拎強積金），才可取回供款，以作退休之用。
了解完兩者嘅由來，咁我地接落黎講下佢地兩者有咩主要嘅分別。
強積金同公積金四大分別
1. 供款
同強積金唔同，公積金計劃嘅供款細則係由僱主決定，包括係由僱主單方面供款定係雙方共同供款。而強積金係有法例訂明由雙方（僱主同僱員）進行供款，而供款額係僱員入息嘅5%（上限係$1500，而員工人工唔過$7100就剩係僱主先要供）。
2.投資決定
公積金嘅投資決定（即係買咩基金用邊間公司等等）通常都係由老細話事。而強積金呢，員工就可以自行選擇想投資邊隻基金（大家記得要整合自己嘅MPF – 想知點解可以睇下我地整合MPF呢篇文章）。若果各位係想自己揀退休計劃嘅投資組合等自己可以控制返風險程度，咁筆者會建議各位用強積金。
3. 歸屬比例
歸屬比例條款係ORSO同MPF之間最大嘅分別啦。公積金通常都會有歸屬比例條款，而MPF係冇嘅。歸屬比例條款係指僱員係果間公司工作幾年之後，先可以按比例（工作年期）得到僱主的供款。一般黎講，若果僱員係公司做少過3年係唔會有任何僱主公積金供款嘅權益架。若果做滿五年就會有50%，六年就會有60%如此類推（大家記得留意返條款）。但係MPF就唔係啦，無論你做左幾耐都好，所有嘅供款包括你自己、僱主嘅供款都係屬於你架。所以入職嘅時候要諗諗自己會唔會做得長先揀ORSO或MPF。
4. 提取安排
MPF嘅提取安排好簡單，你只要夠65歲又或者係法例訂明嘅其他情況（比如移民）你就可以拎走啲錢。但係公積金就唔同，離職嘅時候會用上面提及嘅歸屬比例條款計算所得嘅利益，之後受託人（即係你公積金計劃果間公司）會將利益總額中嘅「最低強積金利益」，轉移到你指定嘅強積金户口，剩返嘅部分先可以提取出黎。
「最低強積金利益」按以下兩個方法計算，以較小者為準（注： 出處為積金局網站）：
- 僱員供款累算的公積金＋按「歸屬比例」計算由僱主供款累算的公積金；
- 離職那一年的每月平均有關入息×強積金實施後的服務年期×1.2
啫係點？舉一個例子說明。
- 假設你每月嘅有關入息係$50000，僱主同你都會供5% 。而你係呢間公司已經做左8年（當歸屬比例按年加10%）並準備離職。首先僱員帳戶結餘已經供左$50000 x 5% x 12 x 8= $240,000，而同樣僱主果邊因為都係供5%所以帳户結餘都係$240,000，只不過因為有歸屬比例，我地要將呢$240,000 X 0.8 = 192,000。兩者加埋就係$432,000。
- 假設你離職果一年每月平均收每月有關入息係$50,000，但係而家有關入息水平嘅上限係$30,000，所以我地會以$30,000去計。同樣地做左8年。
$30,000 X 8 X 1.2 = $288,000
按照以上例子你嘅最低強積金利益係$288,000而你嘅公積金權益有$432,000，換句話講只要將$288,000轉移到自己揀嘅強積金户口計劃就得，而其他（$432,000-$288,000 = $144,000)就可以以現金方式提取。若果情況係掉返轉（啫係話最低強積金利益大於公積金權益）就所有ORSO入邊嘅錢都要轉去強積金計劃啦。
總結
若果要揀ORSO，大家要留意所有僱主提供嘅資料包括供款安排，歸屬比例同投資組合先揀，因為只有入職嘅時候先有機會揀，之後冇得返轉頭。另外要注意嘅係歸屬比例條款，筆者建議，若果你冇打算係呢間公司長做嘅話就一定唔好揀ORSO。
但係大家謹記，無論係決定ORSO或者MPF又好，投資邊隻基金都好，一定要做好功課，了解多啲自己嘅退休計劃。
如果睇完都係決定唔到嘅話，大家可以去InMAP平台問下專業顧問嘅意見順便仲可以整合埋MPF。
References:
