食物金字塔大家應該都聽過，理財金字塔唔知大家又有冇聽過呢？理財金字塔大致上分開四層 ，每一層都有佢嘅作用。最底部嘅係我地嘅個人風險管理（即係保障），上一層就係我地嘅儲蓄，再上一層就係投資而最高嘅就係投機。大致嘅圖如下：
係上一篇文章（理財）提及到點樣通過計理財空間去實踐我地嘅目標。呢篇文章就講下方法點樣運用理財金字塔呢個概念去完成我地嘅目標。但係佢並唔係絕對，只不過係一個概念，比我地有個基礎認知點樣去分配好我地手上嘅資源（理財空間）。
係呢個金字塔入邊，我地可以一層一層咁慢慢向上游，當完善左一層之後，我地就可以向上走一層。 但更重要嘅其實係點樣分配好我地嘅資源，就好似食物金字塔一樣，五穀類嘅就要食最多，脂肪同油就要食最少。
第二層 – 儲蓄（50%）
我地慢慢以活期、定期或收息股去儲錢，累積財富，令我地嘅資源變大。咁我地先有能力去投資更好嘅野，因為係做任何投資之前（包括買樓、做生意等等）我地都需要一筆資金。而呢筆資金就係通過我地自己努力儲返黎，呢啲工具雖然唔會會有顯著嘅回報，但係另一方面佢有穩定嘅收益。當儲到一定金額（每個人都唔同），有良好嘅基礎，我地就可以上一層。另外，若投資果邊失利都好（touch wood)，最起碼我地嘅儲蓄都會慢慢增加，唔會一下子冇哂。儲蓄同時係我地一個現金安全網，活期存款及現金嘅安全網最好係有至少足夠我地六個月嘅開支。
第三層 – 投資（20%-30%）
投資，主要係利用一啲冇咁高風險嘅工具令你嘅財富增值，例如高收益債券、股票、基金等。而我地點樣揀適合自己嘅投資工具呢？首先要了解嘅係佢地嘅風險程度，最低嘅會係高收益債券（除左垃圾債卷（Junk Bond））、之後就係基金同股票。基金需然會有一定嘅收費，但以風險黎講會比股票低。因為一來佢係買緊一籃子嘅股票/債卷。二來就係基金經理及其團隊擁有嘅智識同專業程度一定會比普遍大眾高，揀股嘅眼光會比我地好（最少比筆者好）。另外就係我地可以以月供嘅方式買基金（當然唔係Direct Fund）而更重要係可以用少少錢慢慢供買到唔同種類嘅股票，比起我地自己買股票更能做到分散風險嘅效果。而股票就比起前兩者回報相對高啲但風險比較高需要嘅專業智識都要高啲，最重要都係果句唔好盲目聽Number。
大家進行投資之前要了解自己嘅風險承受能力（risk tolerance level），再揀適合自己嘅產品。
第四層 – 投機（量力而為）
呢一層會以比較高風險嘅產品進行投資以獲取高回報，而投資工具會有衍生工具、期貨、窩輪什至係早排風靡一時嘅虛擬貨幣（Cryptocurrency) 等等。另外仲有磚頭都係，雖然係我地眼中磚頭係比較穩慎，但係係投資界黎講都係屬於呢層。雖然呢啲工具可以係短時間帶比我地回報，但係大家一定一定要具備相當智識先好投資，因為可能隨時連本都冇埋。另外大家亦要小心係其他國家嘅投資項目（好似日本樓、柬埔寨樓等等），大家一定要做多啲資料搜集，雖然都係磚頭，但始終唔係當地人，唔熟果道嘅市道同其他因素，相對要承擔嘅風險會更高。
投資涉及風險，資產價格可升可跌。大家係進行投資之前，一定要了解清楚自己要買嘅產品，唔好盲目聽人講，千祈唔好只注重回報而忽略左風險同重要嘅信息。
第一層 – 個人風險管理（10%-20%）
我將呢個放係最尾先講係有原因，因為筆者認為佢嘅作用唔係只係第一層。而係將我地成個理財金字塔包住，就好似一個保護網一樣，點解？因為如果我地冇做到/冇做好呢一層，當有咩事起上黎嘅時候，我地只會係上邊三層攞錢，我地亦都有可能更因此而停工，令收入冇左。但係若果我地已經做好左呢一層，我地只不過將自己個人因為遇上風險時而要承擔經濟上嘅損失轉移比保險公司，咁樣可以令我地無後顧之憂，好似一個保護網咁保護我地自己嘅資產同家人。當有事都好，我地點都唔會郁到我地上邊果三層。
正如一開始所講，理財金字塔只不過係一個概念，因為每個人情況都唔同，大家唔洗跟到足，最緊要係做好保護網同揾岩自己嘅投資方法。但係筆者建議大家一定要打好第一、二層嘅基礎先，之後係第三、四層揾到更多嘅錢。
