我地有可能都會聽過Agent講過一般保險(General Insurance)呢個詞。照字面睇，一般保險咪就係一般我地買果啲保險好似人壽危疾果啲。。。其實一般保險並唔係指人壽保險或危疾保險。一般保險提供除左身故以外嘅損失保障，例如事故令你身體受傷或者資產受損。而一般保險係我地多數聽過嘅會係旅遊保、車保、家傭保險等等。。。而人壽危疾果啲就會叫做長期保險。
一般保險當中包括但不限於
1. 旅遊保
我地而家通常去旅行都會買一份旅遊保。因為買佢唔貴但保障範圍就好大，物超所值。但都要留意自己買果間嘅保障範圍係點樣。比如有冇包手機、電腦果啲，另外，主要就係一啲高危活動（潛水、爬山）有冇包啦。記得睇清楚條款又或者問下Agent。
要Claim嘅話就要留意啲細節位，例如唔見左銀包，大家係需要先係當地報左警之後先Claim到架。其實大家有咩突發情況記得記得第一時間問返Agent，因為佢地比我地熟理賠嘅過程，點樣易啲去Claim佢地會清楚過我地。最怕係到時因為某啲小原因而冇得賠，但係簡單問Agent一句（都係果句，係佢地職責黎架麻）就可以免除左我地嘅煩惱之餘亦都幫左Agent做小好多野。因為我地搞唔到都係要揾佢地幫手搞。
大家如果係Claim方面想諮詢下意見可以去InMAP問下專業顧問嘅意見。
2.車保
係香港，買車就一定要有車保先出得街。而車保除左唔同公司、唔同類之外主要分為兩種 – 全保同三保（第三者責任保險）。兩者係價錢上，全保肯定貴過三保，但係佢地之間仲有咩分別呢？
全保 – 基本乜都包，比如你撞到人地架車，全保係會包你架車嘅修理費同人地架車嘅修理費，當然要扣減返墊底費（如果想了解咩係墊底費可以參考呢篇文章：墊底費）同埋折舊啦。另外，被人偷左架車或者有水災火災呢啲都有得賠。
三保 – 因為係第三者責任保險，意思係除左意外發生果時投保汽車嘅司機以外嘅人都係第三者，乘客亦都算係第三者。例子：你撞到人架車，除左自己果架車嘅修理費要自己比之外。基本上，其他嘅保險公司都會賠，比如人地架車嘅修理費、乘客。當然，同樣都係要比墊底費架啦。
兩種都一樣，一Claim左下年就會加價（Loading)同冇左無索償折扣（NCB/NCD）（想了解咩係NCD/NCB可參考：NCD定NCB）。
3.家居保
就係保屋企嘅財產包括一啲貴重物品、家俬等等。另外亦可以加唔同嘅自選保障。詳情可以揾返保險公司/Agent問下。
4.家傭保
若果有請/有意想請姐姐嘅就一定要買。因為根據《僱員補償條例》規定唔為姐姐買家傭保係犯法架。大家係買之前記得要睇下保障嘅範圍有冇包危疾。因為姐姐病左又或係因意外受傷顧主係須要為姐姐比醫療嘅洗費。小錢都還好，但若果係大病嘅就好麻煩。所以大家唔好省果幾百蚊，要買埋危疾。
5.火險
火險只係包天花板、門窗同埋四面牆。唔同家居保，屋入邊嘅財物全部都唔保架。
6.意外保險
保障你因為意外而引致嘅醫療費用。值得一提嘅係，意外保障係長期保險果邊都有得買，而一般保險呢邊係會因為你Claim過而加價。
7.團體醫療
公司醫療。一般都係保障會比較少，要睇返自己公司買果份Plan係啲咩，最好問下Agent自己嘅Plan係包啲咩。（睇下以下文章可以知道點解有公司醫療仲要買個人醫療）
總結
除左以上之外一般保險仲有好多唔常見嘅保險例如水險、海外升學保險、Working Holiday保障等等，基本諗到嘅都會有。想知道仲有乜可以保？可以入黎係InMAP揾專業嘅Agent問下。
